Oscar: Beampte aangekla oor 'dronk skietery'
2013-02-21 07:00
Johannesburg – Die ondersoekbeampte in die Oscar Pistorius-moordsaak word deur sewe aanklagte van poging tot moord in die gesig gestaar, berig Eyewitness News.
Die aanklagte hou verband met 'n skietvoorval wat plaasgevind het terwyl drie polisiebeamptes, insluitend Botha, na bewering dronk was.
Ten spyte hiervan, beplan die polisiebestuur om hom op die hoë-profiel Pistorius-ondersoek te hou.
Botha, wat die polisie-ondersoek lei na die skietery wat op Valentynsdag in Pistorius se huis plaasgevind het, en die twee ander beamptes sal in Mei in die hof verskyn.
Die drie beamptes was na bewering dronk toe hulle 'n staatsvoertuig bestuur en op 'n taxi met passasiers losgebrand het. Hulle is in 2011 in hegtenis geneem.
Die polisie het bevestig dat Botha in verband met die skietery in hegtenis geneem is. Die aanklagte is aanvanklik laat vaar, maar is intussen weer heropen.
"Die kantoor van die direkteur van openbare vervolgings het besluit om sewe aanklagte van poging tot moord teen die beamptes te bring. Dit was die getal mense wat in die taxi was," het Neville Malila, polisiewoordvoerder, gesê.
Malila het gesê Botha is gekies om die Pistorius-saak te hanteer omdat hy 'n gesoute speurder is en dat daar geen planne is om hom van die ondersoek te onttrek nie.
Pistorius word daarvan beskuldig dat hy sy vriendin, Reeva Steenkamp, op Valentynsdag in sy huis doodgeskiet het. Sy borgtogaansoek sal Donderdag 'n derde dag betree wanneer slotbetoë vir en teen borgtog aangehoor word.
Die hofverrigtinge begin 11:00.
– Lees meer hier
– Volg Nuus24 op Twitter
