Optog teen e-tol beweeg deur Jhb, Pta

2012-11-30 13:04

Johannesburg – 'n Protesoptog deur die vakverbond Cosatu teen die omstrede e-tolstelsel het Vrydagoggend gelyktydig in Johannesburg en Pretoria begin.

Betogers in Johannesburg het Cosatu-liedjies gesing en gedans terwyl hulle deur die middestad gestap het.

Phutas Tseki, Cosatu se voorsitter vir Gauteng, het gesê die betogers sal eers stap tot by die kantore van die departement van plaaslike regering en behuising.

Cosatu gebruik dié betoging ook om protes aan te teken teen die onlangse sloping van huise in die provinsie.

"Die sloping van huise in Lenasia, van hostelle in Mamelodi, en van hutte in Boipatong moet gekeer word," het Tseki gesê.

Vier memorandums sal na verwagting in Johannesburg en Pretoria aan verskillende staatsdepartemente oorhandig word.

Die aantal betogers in Johannesburg was laer as verwag, maar Patrick Craven, woordvoerder vir Cosatu, het gesê steun sal later toeneem.

In Pretoria het die polisie 'n wakende oog oor betogers gehou wat van Sophie de Bruyn-straat na Madibastraat gestap het.

Dumisani Dakile, Cosatu se provinsiale sekretaris, was onder die betogers in Pretoria.

– Volg Nuus24 op Twitter.