Opsigters in hof ná hulle hond glo lewend begrawe
2011-11-22 10:09
Kaapstad – Twee opsigters sal na verwagting vandeesweek in die Khayelitsha-landdroshof verskyn nadat hulle glo 'n hond lewend begrawe het.
Poto Mfengu en Mkhumbuzi Ncedana, wie se saak Maandag vir verdere ondersoek uitgestel is, staan tereg op aanklagte van dierewreedheid nadat die hond op 20 Oktober op die sportveld van die Luhlaza Sekondêre Skool gered is, berig die Cape Times.
Die twee verskyn Vrydag in die hof.
Die hond wat by haar redders bekend staan as Warrior, is uit 'n put van 1,5 m diep, waar sy sowat 30 minute vasgekeer is, gered.
Personeel van die Mdzananda-kliniek in Khayelitsha het Warrior Maandag na die hofgebou gebring waar diereliefhebbers met hul eie honde buite die hof betoog het vir "geregtigheid vir Warrior".
Jane Levinson, koördineerder van die kliniek, het gesê Warrior herstel "baie goed" en word weekliks vir hidroterapie en akupunktuur geneem.
Mfengu en Ncedana werk steeds by die skool.
Paddy Atwell, ’n woordvoerder van die Wes-Kaapse departement van onderwys, het gesê daar is geen rede hoekom die mans nie kan terugkeer werk toe nie.
Die polisie het die mans ure ná die voorval in hegtenis geneem. Hulle is die volgende dag vrygelaat.
– Volg Nuus24 op Twitter
- SAPA