Oprah-program lei tot Moodley-aansoek
2012-01-27 08:06
Johannesburg – ’n Oprah-program op TV het hom laat besef hy kan sy onskuld bewys, het die moordenaar van Leigh Matthews Donderdag in die hooggeregshof in Johannesburg gesê.
“Op die program het baie mense vertel hoe hulle ook skuld beken het nadat valse bewyse aan hulle voorgelê is ... Die wêreld is vol stories van mense wat ná jare onskuldig bewys word,” het Donovan Moodley (31) in sy aansoek om herverhoor aangevoer.
Hy is in 2005 skuldig bevind aan Matthews se moord en menseroof en die afpersing van haar pa, Rob.
Hy het oorspronklik skuld beken, maar beweer nou hy het toe gelieg omdat brig. Piet Byleveld, ondersoekbeampte in die saak, hom gedwing het om ’n bekentenis af te lê en hy “daardie tyd enigiets sou sê”.
Dit was volgens hom omdat die staat bewyse so gedokter het sodat niemand die ware storie sou hoor nie.
Die waarheid is volgens Moodley dat drie dwelmsmouse hom gedreig het om by die ontvoering betrokke te raak en dat hy moes toekyk hoe een van hulle, net bekend as Jemba, haar doodskiet.
“Die rede waarom daar geen bewyse van ’n Frank, Alli en Jemba is nie, is omdat hulle (die polisie) geen tyd daaraan bestee het om hulle te vind nie,” het Moodley gesê.
Hy het Donderdag punt vir punt deur bewysstukke in die dossier gewerk wat volgens hom bewys hy is onregmatig vervolg.
Volgens hom het mnr. Matthews sy verklaring onder Byleveld se invloed verander en is ander bewysstukke, soos ’n loterykaartjie met sy vingerafdrukke op wat in me. Matthews se motor gevind is, daar geplant.
Mnr. Matthews en sy vrou, Sharon, asook hul vriende wat die verrigtinge Donderdagoggend bygewoon het, het nie ná middagete teruggekeer om verder na Moodley se argumente te luister nie. Moodley se ouers, Mary en Stephen, het gebly.
Regter Joop Labuschagne se versoeke aan Moodley om nie alles in die dokumente te herhaal nie, het hom nie van stryk gebring nie.
Adv. Zaais van Zyl het vroeër aangevoer Moodley se argumente dra geen waarde nie en sy aansoek moet ook van die hand gewys word omdat dit jare te laat is.
Uitspraak word volgende week gelewer.
Volg Nuus24 op Twitter