Opposisieleiers en Zuma byeen oor kwessies
2011-06-04 07:15
Kaapstad - Populistiese en rassistiese uitlatings deur onder andere Julius Malema, ANC-jeugligaleier, in aanloop tot die munisipale verkiesing was hoog op die agenda toe pres. Jacob Zuma gister met politieke leiers in Tuynhuys vergader het.
Dr. Pieter Mulder, leier van die VF+, het ná die vergadering van twee uur gesê Zuma het eers ’n paar sake aangeroer, waarna opposisieleiers ook kwessies kon opper.
Volgens Mulder het hy verwys na Malema se uitlating dat “alle wit mense misdadigers is” en dié van ander leiers dat net ANC-lede hemel toe gaan.
“Dit is gevaarlik en polariseer die land net verder. Dit het dalk korttermyn-voordele vir ’n verkiesing, maar ons moet op die lang termyn fokus.”
Volgens hom het Zuma in reaksie die skeiding tussen sy rol as staatshoof en dié van ANC-leier beklemtoon. Zuma het aangedui hy het op gister se vergadering as president van die land opgetree. Hy het ooreengekom om die boodskap aan die ANC-leierskorps oor te dra.
Mulder het die vergadering as sinvol bestempel en gesê dit is in die belang van die demokrasie om ’n tweerigting-gesprek te hê.
Volgens Letlapa Mphahlele van die PAC is hulle ook oor die situasie in Libië en die Ivoorkus ingelig.
“Die president het gesê toe hulle die Veiligheidsraad se resolusie oor Libië gesteun het, was hulle onder die indruk dit is bloot om die Libiese weermag te verlam.
“Tot Suid-Afrika se skok is die resolusie deur Westerse magte misbruik om eerder kol. Moeammar Ghaddafi te probeer doodmaak.”
Oor die oorskot van die ontslape vryskutfotograaf Anton Hammerl wat in Libië doodgeskiet is, het Zuma gesê niemand is seker waar die oorskot is nie.
“Die ambassade gee aandag daaraan. Hulle soek na DNS en het ’n onderneming aan die familie gegee dat die soektog voortgaan. Logisties is dit nie so maklik nie,” het Mulder verduidelik.
Cherryllyn Dudley van die ACDP, mnr. Jeff Radebe, minister van justisie, en Ben Skosana van die IVP was ook teenwoordig.
Volg Nuus24 op Twitter
- Die Burger