Opposisie meen SA is vandag '’n baie beter plek'
2011-11-11 09:06
Kaapstad – Opposisiepartye meen met Julius Malema uit die pad is Suid-Afrika vandag “’n baie beter plek” en kan die land se internasionale beeld en rasseverhoudinge herstel word.
Kommentators het egter water op die vreugdesvure gegooi en gemaan dit is nie noodwendig die einde van dié geskorste ANC-jeugleier nie.
Ook die Suid-Afrikaanse Instituut vir Rasseverhoudinge (SAIRV) het gewaarsku “nuwe Malemas” sal na vore tree solank as wat die helfte van die jeug werkloos is en skreiende ongelykheid heers.
“Malema is ’n produk van sy omstandighede. Die ongelykhede waarmee Suid-Afrika sit, sal altyd ’n teelaarde vir politieke radikalisme wees. Dit sal dus ’n fout wees om Malema se skorsing as die einde van dié radikalisme te vertolk,” het Catherine Schulze van die SAIRV gesê.
Volgens haar is die ANC se nasionale tugkomitee se besluit om Malema vir vyf jaar uit die regerende party te skors “ongewoon fel” en was dit waarskynlik die enigste uitweg om sy opgang in die party te stuit.
Aubrey Matshiqi, politieke ontleder, het gesê dit is te vroeg om Malema se einde te voorspel en dat sy skorsing sal toets hoe groot sy ondersteuning binne die ANC werklik is. “Die vraag is of hulle (Malema se ondersteuners) bereid is om hul politieke loopbane vir hom op die spel te plaas.”
Prof. André Duvenhage, politieke ontleder van die Noordwes-Universiteit, het voorspel daar wag ’n jaar van “hoogdrama en spanning” binne die ANC.
“Daar is bloedverlies by Malema, maar ons het nog nie die einde van die magspel gesien nie. Dit is nie skaakmat nie.”
Die vakverbond Cosatu het net in ’n kort verklaring gesê hy neem kennis van die sanksies teen Malema en sy medeleiers in die ANC-jeugliga.
Intussen het dr. Pieter Mulder, leier van die VF+, aangevoer Suid-Afrika is ’n baie beter plek omdat die ANC “uiteindelik die moed gehad het” om Malema van die politieke terrein te verwyder. Mulder en Velapi Ndlovu, IVP-LP, meen die jeugleier het die land se internasionale beeld skade berokken.
“Met sy uitlatings oor nasionalisering het hy buitelandse beleggers afgeskrik, terwyl sy rasse-sienings verhoudinge vertroebel het,” het Mulder gesê.
Die burgerregte-organisasie AfriForum stem saam Malema se afwesigheid kan ’n gulde geleentheid bied om gemeenskapsverhoudinge te “normaliseer”.
Die kantoor van pres. Ian Khama van Botswana wou Donderdag nie kommentaar lewer nie.
– Volg Nuus24 op Twitter
- Die Burger