Oppassers vas vir 3-jarige se moord
2011-12-23 23:00
Bloemfontein – 'n Vrou en haar kêrel is Vrydag naby Vrede in die Vrystaat in hegtenis geneem vir die moord op 'n driejarige dogterjie, wat deur die paartjie opgepas is, het die polisie gesê.
"Hulle voer aan dat die kind uit 'n bed geval het, maar die uitslag van 'n staatsondersoek het onthul dat 'n moord plaasgevind het, en dat die kind oor 'n lang tydperk mishandel is," het sersant Mmako Mophiring gesê.
Amahle Majola is op 3 Oktober op die Driehoek-plaas dood waar sy deur haar 35-jarige tante en die vrou se kêrel (30) opgepas is.
"Die kind het die tante vermoedelik geïrriteer met haar huilery. Sy het die kind se kop teen die vloer gestamp waarna die dogterjie haar bewussyn verloor het. Toe haar kêreld opdaag het hulle 'n ambulans gebel. Die kind is in 'n hospitaal in Vrede dood," het Mophiring gesê.
Die man het 'n verklaring afgelê waarin hy beweer dat die kind uit 'n bed geval het.
'n Nadoodse ondersoek, wat op 22 Desember gedoen is, het onthul dat "die kind veelvuldige inwendige beserings, 'n geswelde kop, breinskade, ribbeserings en verdere aanwysings van mishandeling oor 'n lang tydperk aan haar liggaam gehad het."
Die paartjie is in hegtenis geneem nadat die nadoodse ondersoek uitgevoer is.
Volg Nuus24 op Twitter.
- SAPA