Oppasser het glo aanvaller geken
2010-04-26 09:17
Johannesburg – Die oppasser wat verlede week saam met die eenjarige, Marzaan Kruger, in ‘n huis in Robin Hills aangeval is, het die aanvaller glo geken en hom in die huis gelaat.
Times Live het Maandagoggend berig dat Francina Sekhu die man na bewering in die huis ingenooi het en dat hy saam met hulle televisie gekyk het voordat hy Sekhu en die eenjarige Marzaan wreed aangeval het.
“Ek voel verraai. Ek’t nie gedink hy sal dit aan my doen nie,” het ‘n hartseer Sekhu uit haar hospitaalbed in die Helen Joseph Memorial-hospitaal aan Times Live gesê.
Hierdie skynbaar sinnelose aanval op die oppasser en die baba het verlede week skok golwe deur die land gestuur.
Verdagtes vasgetrek:
Twee mense is oor die naweek in hegtenis geneem in verband met die wrede aanval.
Kol. Eugene Opperman van die Suid-Afrikaanse Polisiediens kon egter nie sê of die polisie verwag om meer verdagtes in verband met die saak in hegtenis te neem nie.
"Die ondersoek duur voort. Ons sal sien wat daaruit voortspruit," het Opperman Sondag aan Sapa gesê.
Opperman het bevestig dat gesteelde goedere in besit van die verdagtes gevind is.
Hy kon egter nie bevestig of 'n skootrekenaar en modem wat, volgens berigte tydens die voorval gebuit is, teruggevind is nie.
Die verdagtes is Saterdagaand in Alexandra vasgetrek.
Die polisie kon geen verdere besonderhede verskaf nie.
Die twee verdagtes, onderskeidelik 23 en 25 jaar oud, sal na verwagting Maandag in die Johannesburgse Landdroshof verskyn.
Hulle staar aanklagte van poging tot moord en roof met verswaardende omstandighede in die gesig.
- Sapa, Times Live
Volg Nuus24 op Twitter.