Operasie moet wag vir sokker
2010-06-02 06:33
Antoinette Pienaar, Beeld
Johannesburg – Staatspasiënte op die Steve Biko- Akademiese hospitaal se waglys vir beplande operasies sal tydens WB 2010 moet terugstaan sodat hospitaalbeddens oopgehou kan word vir noodgevalle in Pretoria.
Dit het ’n 51-jarige Pretoriase vrou gehoor die dag voordat sy by dié hospitaal sou aanmeld vir ’n operasie om ’n breuk te laat herstel.
Me. Cathy van Heerden van Pretoria-Noord het gister gesê sy het erge pyn en ongemak.
“In Februarie het hulle gesê ek moet 13 April opgeneem word. Daar was nie beddens nie en ek is aangesê om gister terug te keer.
Die dokter het my (eergister) gebel en gesê ek moenie inkom nie, want hulle moet beddens oophou vir die sokker.”
Van Heerden het in Januarie 2005 ’n histerektomie gehad.
Die wond het erg septies geword en bykans ’n jaar geneem om te genees.
“Daar is nou ’n breuk oor feitlik my hele buik en dit voel of net vel my ingewande inhou. Soms kan ek die derms voel. Dan druk ek dit maar terug.”
Haar dokter het glo gesê sy sal ’n groot operasie moet kry sodat haar ingewande met gaas in posisie geplaas kan word.
“Hoekom moet ons gewone landsburgers terugstaan vir die sokker? Ons het mos ’n reg op gesondheidsorg.”
Fredah Kobo, hospitaalwoordvoerder, het aan Beeld gesê die kwessie is moontlik verkeerd aan pasiënte gekommunikeer.
“Ons hospitaal is toegewys om P1-gevalle (ernstige noodgevalle) tydens die toernooi te ontvang.
“Dokters is gevra om elektiewe (beplande, nie-noodsaaklike) operasies tussen 1 Junie en 12 Julie te beperk.”
Mandla Sidu, woordvoerder van die Gautengse gesondheidsdepartement, het benadruk dokters moet hul diskresie gebruik.
“Die besluite behoort nie ’n pasiënt te benadeel nie.”
Dr. Trevor Fisher, uitvoerende hoof van die Dr. George Mukhari-hospitaal in GaRankuwa, het gesê dié hospitaal gaan nie elektiewe chirurgie beperk tensy daar ’n noodgeval is nie.
Dr. George Mukhari sal help om pasiënte oor te neem by Steve Biko indien byvoorbeeld ’n groot ramp, soos ’n bomontploffing of busramp, gebeur.
Steve Biko moet volgens Fisher beskikbaar bly omdat dit naby die Loftus Versfeld-stadion is.
Fidel Hadebe van die nasionale departement van gesondheid het gesê die bewering dat daar ’n formele ooreenkoms met Fifa is om die land se hospitale halfleeg te hou is onwaar.
– Beeld
Volg Beeld op Twitter