Openbare vervoer op hete kole
2011-08-31 17:28
Johannesburg – Alle busse en taxi’s op Suid-Afrikaanse paaie sal van nou af afgetrek en geïnspekteer word, het Sibusiso Ndebele, minister van vervoer, Woensdag aangekondig.
“Minstens 76 mense is vandeesmaand [Augustus] dood in agt aparte botsings wat openbare voertuie in KwaZulu-Natal, die Vrystaat, Mpumalanga, die Wes-Kaap, Gauteng en die Oos-Kaap betrek het,” het hy gesê.
Ndebele sê die situasie is besig om “hand uit te ruk”.
Altesaam 32 mense het die afgelope week in drie busongelukke gesterf. Die oorledenes sluit 15 kinders in.
Vyf mense het Dinsdagmiddag gesterf toe hul bus naby die Murrayhill-tolhek, noord van Pretoria, omgeslaan het.
Altesaam elf mense is Dinsdagaand dood toe hul bus naby Aberdeen op die R61 in die rigting van Beaufort-Wes ook omgeslaan het.
Vyftien kinders en ‘n busbestuurder is verlede Woensdag in Knysna dood toe hul bus in ‘n rivier beland het.
Volgens Ndebele sal owerhede van nou af elke openbare voertuig soos busse en taxi’s aftrek en evalueer.
Volg Nuus24 op Twitter.
- SAPA