Oorsese dokters help Joost
2011-05-24 10:59
Kaapstad – Die Suid-Afrikaanse oudrugbyspeler Joost van der Westhuizen het Dinsdagaand 'n vergadering met 'n oorsese dokter oor stamselle.
"Ons wil kyk of daar nie 'n oplossing is nie, so ons probeer alles," het van der Westhuizen in 'n onderhoud op Jacaranda 94.2 gesê.
'n Voorlopige diagnose van motorneuronsiekte (MNS) is by Van der Westhuizen gemaak.
"Die eerste opinie wat gegee is,is dat daar nie 'n kuur is daarvoor nie, so ons hoop vir die tweede opinie. Ons wag vir die finale uitslae wat oor drie weke sal kom, want hulle het my op medikasie gesit om te kyk of dit werk."
Hy het gesê wat hom die hartseerste maak is die oordeel van mense.
"Mense is baie maklik om te oordeel. Dit is nie vir my om te wonder wat mense van my sê of wat mense van mekaar sê nie en ongelukkig is dit die hartseer kant.
"Baie mense sê dit is 'n bemarkingsfoefie, dan sê ek vir myself dit is 'n lewensgevaarlike siekte. Hoekom het ek bemarking nodig? Ek wil nie 'n CD verkoop of iets verkoop om geld te maak nie. Ek wil net my eie lewe lei en net 'n goeie pa wees vir my kinders terwyl ek kan. Ek lewe in vrede en gaan net vorentoe."
Van der Westhuizen het gesê intussen doen hy nog alles normaal.
"My regterarm is bietjie swak, ek praat bietjie stadiger en doen alles 'n bietjie stadiger, maar daar is nog hoop.
"Ek loop nog. Ek het Saterdag saam met my pa en broers probeer gholf gespeel. Dit het nie baie goed gegaan nie. Ek het verloor," het hy geskerts.
"Ek dink ek is verby die skok-stadium. Ek dink ek begin nou met die
aanvaardingstadium en dit maak my sterk. Ek moet sê ons het alles baie
stil probeer hou tot ek in die hospitaal kom toe het iemand die media
gebel en dit is waar alles gebeur het. In 'n mate is ek bly dit het
gebeur, want daar is soveel mense wat omgee... En dit hou mens
positief."
Van der Westhuizen het Suid-Afrikaners gevra om aan te hou bid.
Volg Nuus24 op Twitter
- Nuus24