Oorlog in Vrystaatse ANC-kamp
2012-02-07 09:05
Bloemfontein – 'n Burgeroorlog in die kleine het tussen ANC-ondersteuners op Thaba Nchu uitgebreek toe ’n groep van die party se eertydse gewapende vleuel Umkhonto weSizwe (MK) en ondersteuners van premier Ace Magashule mekaar getakel het.
Skote is afgevuur en ’n lid van die sogenaamde Magashule-groep is gewond toe hulle na bewering die MK-groep se vergadering met pangas, knopkieries en klippe opgebreek het.
Dié “skermutseling” het Saterdag in en buite die Barolong-saal plaasgevind op die dag waarop Volksblad berig het oor die MK-groep se “oorlogsverklaring” teen Magashule, die ANC se provinsiale voorsitter.
Konst. Consolation Mokoale, woordvoerder van die polisie, sê ’n groep van sowat 60 ANC-lede, almal na bewering ondersteuners van Magashule, het 42 mede-partylede wat ’n “politieke opvoedingsvegadering” bygewoon het, met pangas, knopkieries en klippe aangeval.
Ingeligtes op Thaba Nchu sê die sogenaamde MK-groep het erg deurgeloop omdat hulle ondersteuners is van die ideaal om Magashule in Junie as voorsitter uit die kussings te lig.
Betty Nzabeza, lid van die ANC se uitvoerende komitee in Motheo wat die vergadering bygewoon het, het aan Volksblad gesê Magashule het na bewering opdrag gegee dat ANC-lede hul gebiede moet beskerm en veg teen diegene wat ongemagtigde byeenkomste in takke hou.
“Dit is ’n opdrag van Magashule,” het sy Maandag gesê.
Volgens ooggetuies moes Mpho Ramakatsa, MK se leier in Motheo, vir sy lewe vlug.
Hy het die naweek die skerp bewoorde verklaring teen Magashule uitgereik waarin hy die ANC-voorsitter se leierskap gekritiseer het.
Mokoale sê in die onderonsie het Mzwandile Phupha na bewering ’n skoot afgevuur wat een van die ANC-aanvallers in die maag getref het nadat hy besef het dat hulle in gevaar is.
“Ek het geskiet omdat hulle van plan was om ons dood te maak,” het Phupha gister buite die Selosesha-landdroshof aan Volksblad gesê. ’n Klag van poging tot moord word teen hom ondersoek en hy is op borgtog van R1 000 vrygelaat.
Phupha het het gesê Paseka Nonpondo, ’n groot ondersteuner van Magashule en sekretaris van die ANC in Motheo, het glo die groep aanvallers na die MK-vergadering vervoer.
Die polisie ondersoek ook verskeie ander klagte van onder meer aanranding en poging tot moord teen mense ná die geveg.
Volksblad het Maandag herhaaldelik probeer om William Bulwane, die ANC se woordvoerder in die Vrystaat, te kontak, maar dit was sonder sukses.
– Volg Nuus24 op Twitter
- Volksblad