Oom vas vir baba se verkragting
2013-01-10 18:04
Johannesburg – ‘n Man wat daarvan beskuldig word dat hy 'n 10 maande oue familielid verkrag het, het Donderdag in die Orkney-landdroshof verskyn, het die polisie in die Noordwes gesê.
Die saak is tot 18 Januarie uitgestel, wanneer die 43-jarige man na verwagting om borgtog aansoek sal doen, het kapt. Pelonomi Makau gesê.
Hy sê die baba se ma het die kind by haar niggie gelos toe sy Dinsdag gaan werk het.
Die niggie het die baba met ‘n uitstappie geneem, maar toe sy ‘n uur later terugkeer, het die kind histeries gehuil.
Toe sy die kind se doek omruil, het sy merke op die baba se geslagsdele opgemerk. Sy het eers gedink dit is ‘n uitslag wat deur die doek veroorsaak is.
Die kind se ma het later die aand ook die merke gesien.
“Die ma het haar na ‘n kliniek geneem, waar die dokter bevestig het dat sy verkrag is,” het Makau gesê.
Die saak is by die polisie aangemeld en hulle het die kind se oom in hegtenis geneem. Hy is al voorheen daarvan aangekla dat hy ‘n familielid verkrag het, het Makau gesê.
– Volg Nuus24 op Twitter
- SAPA
