Oom se haelgeweer klop skurk se plastiekpistool
2012-01-27 07:00
Nelspruit. – ’n 70-jarige pensioentrekker het ’n rower doodgeskiet toe dié hom met ’n plastiekpistool probeer beroof het.
Corrie Potgieter, wat op ’n plaas naby Karino, wes van Nelspruit, woon, het Donderdag omstreeks 07:30 gehoor sy tuinier, Fana Mashalela, praat met iemand buite die huis.
Hy het deur die kamervenster geloer en twee mans by Mashalela gesien staan. Hy het ’n 12 boor-haelgeweer uit die kluis gehaal en na die kamervenster gegaan.
Die mans was weg, maar hy het onraad vermoed omdat Mashalela op sy knieë op die stoep gestaan het.
Die volgende oomblik het een van die rowers van onder die vensterbank opgespring en ’n pistool op Potgieter gerig.
Potgieter het ’n skoot afgevuur en die rower in die gesig getref.
Die man is op slag dood.
By die polisie se aankoms is ’n plastiekpistool (BB gun) wat plastiekballetjies vuur, langs sy lyk gekry.
Volgens sers. Gerald Sedibe, polisiewoordvoerder, het Mashalela gesê daar was inderwaarheid drie rowers. Die ander twee het weggehardloop.
Die aanval was een van tientalle gewapende voorvalle die laaste paar weke op kleinhoewes rondom Nelspruit.
Die gebiede wat die ergste deurloop, is Karino, Hermansburg, Cairn, Cromdale, The Rest en Alkmaar, het Vernon Lancaster, hoofbestuurder van Hi Tech Sekuriteit in Nelspruit, gesê.
– Volg Nuus24 op Twitter
- Beeld