‘Onwettige dobbelmiljoene moet terug’
2010-09-09 07:41
Johannesburg – Aanlyn-casino’s, asook die banke en adverteerders wat hulle ondersteun, sal dalk binnekort die “miljoene rande wat hulle onwettig uit Suid-Afrikaners maak” aan die staat of publiek moet teruggee.
Die hooggeregshof in Pretoria het verlede maand beslis dit is onwettig vir Gautengers om aanlyn te dobbel omdat daar nie ’n lisensie vir dié dobbelary in die provinsie is nie.
Die beslissing het gevolg op ’n aansoek van die maatskappy Casino Enterprises (CES), wat ingevolge Swazilandse wetgewing ’n internet-casino (Piggs Peak Casino) vanuit Swaziland bedryf, teen die Gautengse en die nasionale dobbelrade en die minister van handel en nywerheid.
CES wou daarmee bevele bekom wat verklaar dat wanneer Gautengse dobbelaars sy aanlyn-casino gebruik, die dobbelary wettiglik in Swaziland plaasvind en nie in Gauteng nie.
Vrydag is ’n aansoek om verlof tot appèl teen dié beslissing egter aan die maatskappy toegestaan.
Minstens 30 aanlyn-casino’s, wat in die buiteland gebaseer is, het hul dobbelwebblaaie weens die aanvanklike beslissing vir Suid-Afrikaners gesluit, maar dit sedertdien, glo op regsadvies, heropen hangende die appèlsaak.
Edward Lalumbe, operasionele bestuurder van die Gautengse dobbelraad, het egter gister gewaarsku dat die casino’s, internetdiensverskaffers, adverteerders én finansiële transaksieverskaffers soos banke ’n “reuse-risiko” loop deur intussen met dobbelbedrywighede voort te gaan.
Volgens Lalumbe wil die dobbelraad die Wet op die Voorkoming van Georganiseerde Misdaad gebruik om aan te voer dat alle winste en/of die bates wat met dié winste aangekoop is, verbeur moet word.
“Dié geld of bates wat op die onwettige wyse gemaak is deur die casino’s en almal wat hulle ondersteun, sal dan aan die staat, of dalk selfs die publiek, teruggegee moet word.”
CES voer aan die eintlike transaksie vind nie in Suid-Afrika plaas nie, dus is plaaslike wetgewing wat bepaal dat aanlyn-casino’s geregistreer moet wees sodat regulering kan plaasvind, nie op hulle van toepassing nie.
Die raad meen egter daar is drie aspekte van aanlyn-dobbelary verbonde, naamlik die dobbelaar se besluit op die soort speletjie en grootte van die weddenskap, die proses van die transaksie op die webbediener en die kommunikasieproses wat die uitslag van die weddenskap aandui.
“Minstens twee van dié aspekte gebeur in Suid-Afrika. Dus moet aanlyn-casino’s hier geregistreer wees en totdat dít gebeur, is hul aktiwiteite onwettig.”
Iemand wat aan onwettige aanlyn-dobbelaktiwiteite skuldig bevind word, kan ’n boete van tot R10?miljoen of tien jaar tronkstraf of albei kry.
Volgens Lalumbe gaan die dobbelraad die appèl met alle mag betwis.
“Dit is onregverdig dat buitelandse aanlyn-casino’s miljoene rande uit Suid-Afrikaners maak. Navorsing toon dat 2% van dobbelaars wêreldwyd probleme ontwikkel wat tot verslawing of selfs selfmoord lei.
“Ons moet na die publiek se regte omsien.”
- Volksblad