Ontsnapte gevangene in Vrystaat doodgeskiet

2012-08-15 21:59

Bloemfontein – ‘n Gevangene is doodgeskiet en vier ander is weer in hegtenis geneem nadat hulle uit die Selosesha-polisiestasie ontsnap het, het die Vrystaatse polisie gesê.

Kol. Thandi Mbambo sê ses gevangenes het Sondagaand uit die Selosesha-selle ontsnap. Een van hulle is steeds soek.

Die ses ontsnaptes het twee polisiebeamptes oorval en toegesluit voordat hulle met die sel se sleutels op die vlug geslaan het. Die polisiemans was besig om kos aan gevangenes te oorhandig.

Een van die gevangenes, Thabo Khamare (28), is dieselfde aand in ‘n kroeg in Botshabelo gesien.

Mbambo sê die man is doodgeskiet toe die polisie probeer het om hom in hegtenis te neem.

‘n Ander gevangene, John Lebakeng (27), is Maandagaand in Botshabelo aangekeer.

Ephraim Sechaba en Tshidiso Setlai is later dieselfde aand in die Pieter Swarts- informele nedersetting naby Bloemfontein vasgetrek.

Die mans sal binnekort in die hof verskyn. 

Polisiebeamptes is nog op soek na Mthebelele Alfred Sotyo (51), wat in die Joe Slovo-nedersetting in Phahameng, Bloemfontein, woon.

Volg Nuus24 op Twitter 

- SAPA