Ontploffing ruk Sasol-aanleg in Secunda
2011-08-24 12:15
Mpumalanga – Een persoon is beseer in 'n gasontploffing by die Sasol-aanleg in Secunda in Mpumalanga, het die eNews-kanaal berig.
Vyf ander mense word deur paramedici ondersoek, het Nothemba Noruwana, woordvoerder van Sasol, gesê.
Die ontploffing het Woensdagoggend omstreeks 10:00 aan die westelike kant van die Secunda-aanleg plaasgevind, berig Eyewitness News.
'n Harde slag is gehoor, maar Noruwana kon nie bevestig wat die aard van die slag was nie.
Noruwana het gesê nooddienste is onmiddellik ontbied en die situasie is onder beheer.
Sy het gesê ondersoekbeamptes sal die oorsaak en die volle omvang van die ontploffing te ondersoek.
Die aanleg is intussen ontruim.
Noruwana het gesê die brand by die aanleg hou nie 'n gevaar in vir die gemeenskap nie.
Is jy in die omgewing? Stuur inligting of foto's na Nuus24.
– Volg Nuus24 op Twitter