Ontkleeklub in stryd om sy deure oop te hou
2012-02-06 12:00
Kaapstad – Die Kaapstadse ontkleeklub Mavericks het versoek dat die Wes-Kaapse hooggeregshof die departement van binnelandse sake se terugtrekking van sy korporatiewe permitte as ongrondwetlik verklaar.
Die klub het Vrydag dokumente ingedien nadat hy ‘n reuse-terugslag ervaar het wat daartoe kan lei dat die onderneming sy deure moet sluit, het die Cape Times Maandag berig.
Die klub het aansoek gedoen om ‘n interdik wat die departement sal weerhou om buitelandse ontkleedansers te deporteer.
Die departement het in Oktober besluit om die klub se korporatiewe permitte terug te trek.
Indien die klub hom nie tot die hof gewend het nie, sou die departement van binnelandse sake 16 van sy ontkleedansers deporteer.
Regter Siraj Desai het die aansoek egter Vrydag met kostes verwerp en die saak na die menseregtekommissie verwys om vas te stel of die menseregte van Mavericks se dansers geskend word.
Die dansers word “glad nie betaal nie”, hulle moet weekliks R2 000 aan die klub betaal en hul werk- en lewensomstandighede maak hulle kwesbaar vir uitbuiting.
Desai sê die vroue is in ‘n “kwesbare situasie” en die feit dat die persoon wat verantwoordelik is vir hulle weekliks groot hoeveelhede geld eis, het die eienaar, Shane Harrison, moontlik in ‘n posisie geplaas waarin hy die internasionale protokol teen mensehandel oortree het.
Die klub se aansoek vir ‘n interdik was die eerste van ‘n tweeledige hofaksie.
Die klub bevraagteken die grondwetlikheid van die departement se besluit om sy permitte terug te trek, sowel as die immigrasie-beperkings op grond waarvan die besluit gemaak is.
Harrison sal Maandag met sy prokureurs vergader om vas te stel wat die uitsprake vir die klub sal beteken en sal dan sy volgende stappe beplan.
– Volg Nuus24 op Twitter
- SAPA