Onstabiliteit kan JZ kelder, sê kenners
2010-08-30 07:08
Kaapstad – Pres. Jacob Zuma is in die moeilikheid.
Nie net het hy skaars drie weke vóór die ANC se belangrike nasionale hoofraadsvergadering die steun verloor van twee invloedryke groepe wat hom tot ANC-leier verkies gekry het nie; sy party is weens interne magstryde nou meer onstabiel as op enige ander tydstip sedert 1994.
Boonop waarsku politieke ontleders groter ongelykheid en armoede, werkloosheid, optogte oor swak dienslewering en die staatsdiensstaking toon die ANC sukkel toenemend om die land behoorlik te regeer.
Mnr. Julius Malema, ANC-jeugleier, het verlede Vrydag in sy afsluitingsrede op die jeugliga se nasionale hoofraadsvergadering in Midrand, gesê niemand in die ANC se topleierstruktuur is verseker van ’n tweede termyn nie. Dat hulle Zuma in 2012 by die ANC se volgende leiersverkiesing gaan steun, is dus nie ’n gegewe nie. Mnr. Zwelinzima Vavi, hoofsekretaris van die vakverbond Cosatu, het ook Donderdag die regering van gebrekkige leierskap beskuldig en die ANC-alliansie “wanfunksioneel” genoem en gesê verhoudinge het ’n “dooie punt” bereik.
Volgens prof. André Duvenhage, politieke ontleder aan die Noordwes Universiteit, gebruik Cosatu die voortslepende staatsdiensstaking om ’n politieke boodskap te stuur en is Zuma duidelik in die moeilikheid.
Prof. Steven Friedman, politieke ontleder aan die Universiteit van Johannesburg, stem saam dat Zuma in ’n situasie is waar ’n tweede termyn as ANC-leier nie ’n uitgemaakte saak is nie.
“Hy moet albei (Cosatu en die jeugliga) terugwen, maar hy sal net een van hulle kry.”
Hoewel die ANC nog altyd gebuk gegaan het onder binnegevegte, het die “drukkoker se deksel ná Polokwane afgeskiet” en is ’n presedent geskep vir die ergste onstabiliteit sedert 1994. Hoe groter die onstabiliteit, hoe meer boet die ANC van sy vermoë in om te regeer. “My grootste bekommernis is die invloed wat dít op die staat het. Die ANC kan homself nie bestuur nie, wat nog te sê van die land bestuur,” het Duvenhage gesê.
Volgens mnr. Prince Mashele, hoof van die Sentrum vir Politiek en Navorsing in Pretoria, word die ANC se regeringsvermoë verswak omdat hy uit voeling is met die samelewing.
Die publiek het sy vertroue verloor in die presidensie met al sy skandale en die armes kom in opstand teen munisipale regerings wat nie dienste lewer nie.
“Ek kan nie onthou dat die ANC al ooit in ’n groter gemors was nie. Nie Zuma óf die ANC kan aanspraak maak op die respek en leierskap wat (oudpres. Nelson) Mandela óf (oudpres. Thabo) Mbeki afgedwing het nie,” het Mashele gesê.
Volg Nuus24 op Twitter.
- Die Burger