'Ons waardeer media te min' – Radebe
2012-01-27 08:06
Johannesburg – Enige wet wat mediavryheid in gevaar stel, sal verkeerd wees,” het Jeff Radebe, minister van justisie, Donderdag gesê.
“Die media speel ’n baie belangrike rol in die stryd teen korrupsie,” het hy by die bekendstelling van Corruption Watch (CW) in Johannesburg gesê.
“Mediavryheid stel die media in staat om korrupsie oop te vlek. Ons het dikwels nie genoeg waardering vir die waghondrol wat die media speel nie.
Ons wil hê die media moet voortgaan met sy onvermoeide pogings om korrupsie te ontbloot.”
Radebe het gesê dit sal nie in dié stadium vir hom van pas wees om hom oor die Wetsontwerp op die Beskerming van Staatsinligting uit te laat nie, maar hy steun mediavryheid heelhartig. “Kom ons wag dat die proses afgehandel word.”
Zwelinzima Vavi, hoofsekretaris van Cosatu, het gesê mediavryheid is een van die belangrikste wapens in die stryd teen korrupsie.
“Nie ’n enkele dag gaan verby sonder dat ’n koerant oor korrupte amptenare verslag doen nie.
“Al die stories het een ding gemeen: Korrupsie is soos om die armes helder oordag te beroof.
“Tensy ons mobiliseer en mense bemagtig sal ons nie die vyand, wat al hoe sterker word, oorwin nie.”
Vavi het gesê Cosatu is op elke moontlike manier betrokke om sy teenstand teen die wetsontwerp in sy huidige vorm duidelik te stel en hy neem ook deel aan openbare verhore wat vandeesmaand en in Februarie gehou word.
Radebe het gesê die stryd teen korrupsie is nie minder belangrik as die stryd teen apartheid was nie.
“Korrupsie is misdaad en dit steel die vrugte van ons struggle. Ons moet korrupsie tot vyand verklaar net soos apartheid ons vyand was.
“As ons toegee dat korrupsie ’n leefwyse in Suid-Afrika is, het ons die stryd reeds verloor.”
Die regering is daarvan oortuig dat CW ’n positiewe bydrae in die stryd teen korrupsie gaan lewer, het die minister gesê.
Volg Nuus24 op Twitter
- Beeld