‘Ons verloor renoster-stryd’
2011-06-18 07:49
Johannesburg - Private renostereienaars in Limpopo loop deesdae kwaai deur onder renosterstropers vandat die weermag die stropers in die Krugerwildtuin laat les opsê.
Salomie Maritz van eBlockwatch se “renoster-droomspan” het gister gewaarsku dat die enigste uitweg dalk mag wees om die renosters in “veilige bewaring” te plaas.
Dit volg nadat daar vandeesweek op die karkasse van nog twee renosters afgekom is, onderskeidelik by Cullinan en Naboomspruit (Mookgophong).
In die Cullinan-geval is dit die tweede renoster wat in minder as ’n maand op dieselfde reservaat afgemaai is.
“Die renostereienaars en boere in die omgewing is baie gefrustreerd en heeltemal raadop,” het Maritz gister gesê. “Ek wens daar was meer wat ’n mens kon doen. Ons is dalk besig om die stryd in die Krugerwildtuin te wen, maar niemand kon dit nog regkry om hierdie sindikate te stuit nie.
“Die sindikate in hierdie omgewing is baie gesofistikeerd en gebruik deesdae professionele jaggewere eerder as outomatiese masjiengewere. Aangesien die private eienaars nie dieselfde steun van die weermag geniet nie, is hulle maklike teikens.
“Ons het verlede jaar in die Naboomspruit-gebied alleen sowat 14 renosters verloor, almal binne 80 km van mekaar.
“Ons is nie besig om hierdie geveg te wen nie en die enigste oorblywende opsie vir private eienaars mag dalk wees om die renosters in veilige bewaring te plaas waar ons beter beheer oor hulle het.
“Ons het reeds een so ’n veilige gebied ver van die hoofpaaie af geïdentifiseer en dit met geëlektrifiseerde hekke, asook wagte toegerus.
“Die gebied kan omtrent 30 renosters veilig huisves en ons kyk ook daarna om ’n tweede veilige gebied aangrensend daarvan op te rig indien die nood groter word.
“Maar dit is natuurlik baie moeilik om renostereienaars te oortuig dat dit ’n goeie idee is, want die hervestigingsproses is duur en dit is ’n ongelooflike lang proses om die nodige permitte te kry om die diere te skuif.
“Dit grief my om te dink dat die enigste veilige plek waar renosters binnekort met onaangeraakte horings kan wei in sulke veilige gebiede mag wees.”
Volg Nuus24 op Twitter.
- Beeld