Ons sal op lewe en dood veg, sê stakers
2012-08-17 22:56
Kaapstad – Pres. Jacob Zuma het op ‘n nuuskonferensie in Marikana in die Noordwes gesê hy gaan ‘n kommissie van ondersoek aanstel om die skietery by die Lonmin-myn te ondersoek.
Volgens mediaberigte het honderde mans Vrydagmiddag aan die buitewyke van ‘n koppie by die Lonmin-myn naby Rustenburg bymekaar gekom – ‘n dag nadat 34 mynwerkers in ‘n skietery met die polisie afgemaai is.
Volgens berigte op die toneel het die mans vroeër die middag ‘n vergadering gehou. Ná die vergadering het die mans probeer om na die heuwel op te ruk waar die skietery tussen stakende mynwerkers en die polisie uitgebreek het.
Sapa berig die mans is egter deur die polisie gestop. Hulle het mettertyd hul afstand gehou.
Nadat die mans verskyn het, het ‘n groep vroue wat teen die polisie betoog het, hul klere begin uittrek.
“Hulle wys die polisie dat hulle nie bang is vir hulle nie en dat hulle nie meer respek vir hulle het nie,” het Mmatshepiso Mohlomi, een van die vroue op die toneel, aan die nuusagentskap gesê.
Makhosi Mbongane (32), ‘n werker, het aan The Associated Press gesê mynbestuurders moes na die stakende werkers gaan, eerder as om die polisie uit te stuur.
Mbongane is vasberade om nie terug werk toe te keer nie.
“Hulle kan ons slaan, ons doodmaak en met hul voete op ons trap, doen wat ook al hulle wil doen; ons gaan nie terug werk toe nie,” het hy aan die nuusagentskap gesê.
Altesaam 34 mynwerkers is dood toe die polisie Donderdagmiddag met skerp ammunisie op stakende werkers geskiet het.
Riah Phiyega, die nasionale polisiehoof, het vroeër op ‘n ander mediakonferensie die sterftesyfer bevestig. Meer as 78 mense is ook in die voorval beseer, het sy gesê.
Altesaam 259 mense is in hegtenis geneem vir aanklagte van onder andere openbare geweld, moord, poging tot moord, die besit van gevaarlike wapens en opsetlike saakbeskadiging.
Nog tien mense het die afgelope week in die gewelddadige betogings by die myn gesterf.
Sapa berig die betogings het vermoedelik te make met mededingendheid tussen die National Union of Mineworkers (Num) en die Association of Mineworkers and Construction Union (Amcu) oor erkenningsooreenkomste by die myn. Die werkers wou ook meer betaal word.
Intussen het die Onafhanklike Polisie-ondersoekdirektoraat (Opod) aangekondig dat hy die rol van die polisie in die skietery sal ondersoek.
Volg Nuus24 op Twitter
- Nuus24
