Ons sal nie teruggaan, sê mynwerkers
2012-08-20 12:30
Johannesburg – 'n Groot groep mynwerkers van Lonmin se platinum-myn op Marikana in die Noordwes beplan glo om weer by die heuwel, waar gevegte verlede week tussen die polisie en werkers uitgebreek het, bymekaar te kom.
Van die werkers het aan die SABC gesê hulle sal nie terugkeer werk toe totdat die mynbestuur 'n ooreenkoms met hulle sluit nie.
Na verwagting beplan van die ander werkers om na die Garankuwa-landdroshof te gaan, waar meer as 250 van hul kollegas gaan verskyn in verband met verlede Donderdag se gevegte, waarin 34 betogers doodgeskiet is, het RSG berig.
Die radiostasie berig 'n klein groepie werkers het Maandagoggend wel by die myn vir werk aangemeld.
Sapa berig Lonmin het intussen ‘n ultimatum aan die werkers gestel. Die maatskappy het vir die onwettige stakers gesê hulle sal afgedank word indien hulle nie Maandag by die werk opdaag nie.
Lonmin het vroeër ‘n beroep op stakende mynwerkers gedoen om "die wapens te los" en na hul werkplek terug te keer om hul eise te bespreek.
“Ons is steeds baie optimisties dat werkers sal opdaag,” het Barnard Mokwena, uitvoerende adjunk-president van menslike hulpbronne en eksterne sake, gesê.
“Slegs dan kan ons sit en die situasie hersien en die volgende stap vasstel,” het hy aan SAfm gesê.
Volg Nuus24 op Twitter
