'Ons kan nie so aangaan nie'

2013-01-05 10:25

Johannesburg – Die dodetal op die land se paaie gedurende die feesseisoen het tot 1 300 gestyg, het die Padverkeersbestuurskorporasie (RTMC) Saterdag gesê.

"Hoewel hierdie nie amptelike syfers is nie, kan ek bevestig dat ons al 1 300 lewens verloor het sedert die begin van die feesseisoen.

"Op die oomblik sterf sowat 40 mense per dag op ons paaie," het Ashref Ismail, woordvoerder vir die RTMC, gesê.

Die hoofoorsake van die ongelukke is volgens Ismail spoed, dronk bestuur en voetgangers wat raakgery word terwyl hulle dronk is.

"Ons moet ons sienswyse verander; ons kan nie so aangaan nie. Ons kan nie aanhou om 40 mense per dag te verloor nie. Dit kos die ekonomie meer as R300 miljard per jaar," het Ismail gesê.

Hy het padgebruikers gemaan om versigtig en geduldig te wees.

– Volg Nuus24 op Twitter.