“Ons het nie Malema stilgemaak” - ANC
2010-04-07 11:28
Kaapstad – Gwede Mantashe, sekretaris-generaal van die ANC, het gerugte ontken dat die party hulle jeugliga se president, Julius Malema, verbied het om die boere-moordlied, ‘Skiet die boere’ te sing.
Beeld het Woensdag berig dat Mantashe met president Jacob Zuma gepraat by sy amptelike woning in Pretoria. Mantashe het glo aan Zuma voorgestel dat Malema verhoed moet word om die kontroversiële lied te sing.
“Ons het glad nie oor Julius Malema gepraat nie,” het Mantashe Woensdag aan Nuus24 gesê. Hy het wel bevestig dat hy ‘n ontmoeting met Zuma gehad het.
“Die media is opgewonde oor Julius,” het hy bygevoeg.
Beeld staan by sy storie:
Waldimar Pelser, nuusredakteur by Beeld, het aan Nuus24 gesê dat hy “nie kan glo” dat Mantashe dié ontkennings maak nie.
“Ons joernalis het met hom gepraat en ons staan by ons storie. Dit is ongelooflik,” het Pelser gesê.
Mantashe het gesê die ANC het verskeie van die party se interne strukture na ‘n vergadering uitgenooi, waartydens die huidige situasie met die lied bespreek sal word.
Dié omstrede lied – wat die woorde skiet die boer insluit - is die afgelope naweek uitgemaak as die rede vir die dood van Eugene Terre’Blanche.
Malema het hierdie gerugte Sondag ontken.
ANC sal steeds vergader met ANCYL:
Ishmael Mnisi, ANC-woordvoerder, het aan Nuus24 gesê dat die ANC steeds met die ANC-jeugliga (ANCYL) sal praat oor die kwessie rakende die lied.
“Sover ek weet het die vergadering nog nie plaasgevind nie,” het hy gesê.
Hy het joernaliste aangemoedig om 11:00 ‘n perskonferensie by te woon wat by die Luthuli-huis in Johannesburg gehou sal word.
Die ANCYL het ook gerugte ontken dat Malema met Zuma en Manatshe ontmoet het.
“Daar was nooit so ‘n vergadering nie,” het Floyd Shivambu, woordvoerder, aan Sapa gesê.
-Nuus24
Luister hier na 'n klankgreep van die radio-onderhoud