Ons het alles, sê Tutu
2011-12-02 07:01
Kaapstad – “Ek vra om na my graf te gaan met ’n glimlag. Ek vra dat dit moet wees soos in 1994.”
Emeritus-aartsbiskop dr. Desmond Tutu het Donderdag, op Wêreldvigsdag, by die Desmond Tutu-MIV-jeugsentrum in Masiphumelele buite Kommetjie gesê hy wil graag in vrede na sy graf gaan, maar hy kan nie.
“Hoe kan ons toelaat wat in die land gebeur het,” wou hy weet met verwysing na vier kinders van Noordwes wat van honger en dors gesterf het.
“Ons het alles. As almal nie duur motors wil koop nie, sal daar genoeg vir almal wees, want die land hét genoeg.”
Tutu het gesê Suid-Afrika behoort een van die beste lande ter wêreld te wees, want hier is “talentvolle mense van alle rasse. Maar dit lê binne-in ons om te bereik wat God wil hê ons moet bereik”.
Nadat dr. Linda-Gail Bekker, navorser en adjunk-direkteur van die Desmond Tutu MIV-sentrum aan die Universiteit van Kaapstad, hom bekend gestel het, het die gaste vir hom hande geklap, maar hy wou niks weet nie. “Moenie vir my hande klap nie,” het Tutu gesê.
In sy toespraak het hy aan Chevron, een van die borge van die jeugsentrum, gesê: “Ons sal dalk MIV/vigs kan stop, maar dan ontdek ons ons is besig om te verskroei of te verdrink.
“Ek hoop Chevron is bewus van die gevare wat die aarde kan verwoes.
“Die aarde sal een dag dalk net poef! maak en dan sal ons almal dalk net poef! maak,” het hy laggend bygevoeg.
Ná die verrigtinge het hy saam met die kinders en jeugdiges vir foto’s geposeer en sy hande geverf om ’n afdruk daarvan op ’n nuutgeverfde muur te laat.
Volg Nuus24 op Twitter
- Volksblad