Onrus versprei

2013-01-22 07:10

Johannesburg – Dit wil voorkom of diensleweringsbetogings in die noorde van die Vrystaat besig is om te versprei nadat daar Maandag in twee dorpe onrus was, het RSG Dinsdagoggend berig.

Sebenzile Ngangelizwe, burgemeester van Matjhabeng, moes op Henneman onder polisie-begeleiding uit die Phomolong-stadion padgee toe betogers hom en sy gevolg met klippe gegooi het. 'n Voertuig van die SABC is ook met klippe bestook.

Ontstoke inwoners het geëis dat 'n kliniek in die gebied gebou word.

Ook in die Zamdela- informele nedersetting by Sasolburg het die spanning Maandagaand steeds hoog geloop, met inwoners wat paaie versper en buitebande aan die brand gesteek het.

Richard Baloyi, minister van samewerkende regering, het die gebied gister volgens RSG besoek nadat minstens 150 mense weens openbare geweld in hegtenis geneem is.

Polisieversterkings van Gauteng en Welkom is in die gebied ontplooi nadat inwoners onder andere winkels geplunder het. 'n Aflweringsvoertuig is in die proses gekaap en gebruik om 'n kitsbank oop te breek.

Die betogings het Sondag begin nadat die munisipaliteit inwoners ingelig het oor nuwe planne vir die samesmelting van die Metsimaholo- en Ngwathe-munisipaliteit.

– Lees hier meer.

– Volg Nuus24 op Twitter.