Onnies kort inspirasie, sê Tutu
2012-01-21 06:49
Kaapstad – Maniere moet gevind word om Suid-Afrikaanse onderwysers te verbeter, meen emeritus-aartsbiskop dr. Desmond Tutu.
Tutu het Vrydag by ’n informele geleentheid van die Instituut vir Verantwoordbaarheid in Suider-Afrika (Ifaisa) gepraat nadat hy as Ifaisa se beskermheer aangewys is.
Ifaisa stel hom ten doel om amptenare in gesagsposisies verantwoordbaar te hou en reaksie op die behoeftes van gewone mense te bevorder.
Hy beywer hom ook vir die stryd teen korrupsie en die bevordering van die reg op basiese opvoeding.
Adv. Paul Hoffman, ’n direkteur van Ifaisa, het by die St. George-katedraal gesê die instituut plaas vanjaar die fokus op basiese onderwys. Sy groot projek is om ’n saak in die konstitusionele hof te bring om die reg op basiese onderwys vir almal te verseker.
“Daar is te veel kinders in die openbare skoolstelsel wat langs die pad verdwyn. Hulle kom nie by matriek uit nie. Drie uit vier kinders ontvang ’n matrieksertifikaat wat eintlik niks werd is nie, maar niemand doen iets daaraan nie.”
Volgens Hoffman beoog Ifaisa om ’n aansoek in die konstitusionele hof te bring om die regering te dwing om stappe te doen om die situasie in die openbare skoolstelsel te verbeter.
Die instituut wil ook aansoek doen om ’n toesigbevel waarvolgens die onderwysdepartement elke ses maande oor spesifieke kwessies moet terugrapporteer.
“Dit sal die departement verplig om aan regters te verduidelik wat hulle gedoen het om sake in die skoolstelsel reg ruk.”
Tutu het gesê Suid-Afrika het twee onderwysstelsels – voormalige Model C- en private skole wat soos ’n goed geoliede masjien werk aan die een kant, en staatskole aan die ander kant.
“Ek praat nog nie eens van boeke nie. Die fisieke toestand van sommige skole laat voorts veel te wense oor – gebreekte ruite, modderskole, oorvol klasse... Ons stelsel is seker die ergste in Afrika en dit is skandalig.”
Daar is ooreenkomste met die skoolstelsel van die verlede en die huidige een. “Die verskil is dat ons baie toegewyde onderwysers gehad het. Ons moet ’n manier vind om weer ons onderwysers te inspireer.
“Ons het baie toegewyde onderwysers, maar sommige is ontnugter.
“Ons moet maniere vind om ons onderwysers te verbeter.
“Ons is almal opgemors deur Bantoe-onderrig. Dit gaan ’n lang tyd kos om te herstel van die gevolge daarvan.”
- Die Burger