Onnie lê sewe jaar leeg met volle salaris
2010-12-09 06:30
Die Burger
Pretoria - ’ n Onderwyseres word die afgelope sewe jaar ’n salaris betaal sonder dat sy enigsins skoolhou.
Denise van Dyk, vrou van dr. Manie van Dyk, bekende DA-LP, is sedert 2003 op die betaalstelsel van die Laerskool Wierdapark waar sy musiek gegee het.
Sy is in 2003 na die Eqinisweni Secondary School in die ooste van Johannesburg herontplooi nadat die departement nuwe poste vir sogenaamde magneetskole (musieksentrums) goedgekeur het.
Van Dyk het gister gesê sy het in 2003 weens “veiligheidsredes” beswaar gemaak om na dié skool te gaan en was bereid om na ’n ander skool te skuif.
Sy het toe ’n dispuut teen die departement verklaar en die saak is na die Raad vir Arbeidsverhoudinge in die Onderwys (Ravo) verwys. “Ek het nooit weer van hulle gehoor nie en my salaris is net op ’n dag gestaak.”
Volgens Van Dyk het sy haar tot die Pretoriase hooggeregshof gewend, wat in 2004 gelas het dat die departement haar betaal of haar dienste op ’n regmatige wyse beëindig. Die departement het haar toe weer begin betaal.
Volgens Van Dyk het sy daarna aansoek gedoen om die onderwys om mediese redes te verlaat, maar dit is van die hand gewys.
Die departement het gesê sy moet terug Eqinisweni toe.
Sy het die hof weer genader op grond van die departement se beweerde minagting van die eerste hofuitspraak. Die 2004-hofuitspraak is toe gehandhaaf.
Volgens Van Dyk is sy die afgelope sewe jaar “getraumatiseer” en kon sy nie met haar loopbaan voortgaan nie. Sy beweer sy het verskeie skrywes aan die departement gerig om die saak op te los.
Die beheerliggaam van Wierdapark het die departement ook al ’n paar keer skriftelik ingelig dat Van Dyk sedert 2003 nie meer ’n onderwyser by die skool is nie.
Die departement het by navraag gesê die saak word ondersoek.
Volg Nuus24 op Twitter.
- Die Burger