Onnie blameer nie wag, skool vir roof
2010-08-23 09:36
Centurion - Maretha Kruger, ’n onderwyseres wat Vrydag op die perseel van Hoërskool Centurion deur rowers oorval en beroof is, sê sy blameer niemand vir wat gebeur het nie en dat kinders se veiligheid vir dié skool baie belangrik is.
Kruger, oor wie Beeld Saterdag berig het, meen Shereen Barnard, nog ’n onderwyseres van die skool wat die rooftog aanskou het, en haar pa, adv. Wesley Barnard, het moontlik ná die voorval aan skok gely toe hulle húl weergawe vertel het.
“Dit kon op enige plek gebeur het en dit is nie die skool of die wag se skuld nie,” het sy gesê.
Kruger, wat lewensoriëntering en Duits by die skool gee, en Barnard is glo deur rowers tot by die skool agtervolg nadat hulle geld getrek het.
Die rowers is deur ’n niksvermoedende wag by die skool se hoofingang in- en uitgelaat.
Adv. Barnard het gesê een van die rowers het ’n pistool op sy dogter gerig en die sneller getrek, maar die skoot het nie afgegaan nie.
“Dit het nie heeltemal so gebeur nie,” het Kruger gesê.
“Shereen het uit haar motor geklim om die geld, wat ons vir die skool gaan trek het, in die skool se kluis te gaan bêre.
“Ek het in my motor vir haar gewag toe ek ’n verdagte motor met drie of vier mans aangery sien kom het.
“Ek het geskrik, die toeter gedruk en Shereen se aandag probeer trek, maar toe hou die rowers in hul motor agter my stil.”
Een van die rowers het uitgeklim en ’n rewolwer teen Kruger se kop gedruk.
“Hy het deur die venster oor my geleun en my handsak van die passasiersitplek af gegryp.
“Hy het natuurlik gedink die kontant wat ons getrek het, is in my handsak.”
Die rower het toe weer in die motor geklim en hulle het doodluiters by die hoofingang uitgery.
Adv. Barnard het ná die voorval gesê die veiligheidswag was “nutteloos” en Wouter Burger, skoolhoof, het gesê daar is met die betrokke veiligheidsmaatskappy vergader en dat die wag vervang sal word.
Kruger meen egter dié wag is nie te blameer nie.
“Die rowers het vir hom gesê hulle kom om iemand op te laai, hoe moes hy weet hulle is rowers?” het sy gevra.
Burger het gesê die skool het streng veiligheidsmaatreëls en dat alle skoolhekke in skooltyd gesluit word.
“Buite skoolure is daar vanweë buitemuurse aktiwiteite ’n wag by die valboom by die hoofhek om mense in en uit te laat.”
- Beeld