Ongelukke in Wes-Kaap eis meer lewens as verlede jaar
2009-12-30 07:38
Vania van der Heever
Kaapstad - Byna twee keer soveel mense as in die ooreenstemmende tyd verlede jaar het vandeesmaand reeds in die Wes-Kaap op die paaie gesterf.
Sedert 1 Desember tot gister het 110 mense in 90 ongelukke gesterf. Hiervan was 26 voertuigbestuurders, 47 passasiers en 37 voetgangers.
Verlede Desember was daar 61 sterftes in 48 ongelukke op die provinsie se paaie.
Xenephone Wentzel, woordvoerder van die provinsiale verkeersdepartement, het gesê die ongelukke is deur ’n verskeidenheid redes veroorsaak. Hy het ’n beroep op padgebruikers gedoen om verantwoordelik te wees wanneer hulle die paaie gebruik.
“Mense moet verantwoordelik wees wanneer hulle agter hul stuurwiel inklim. Dit is byvoorbeeld verantwoordelik om ’n veiligheidsgordel te dra.
“Moenie onnodige kanse waag, soos om ander voertuie op ’n onveilige plek verby te steek nie. Mense wat op partytjies drink, moet alternatiewe maniere vind om by die huis te kom en nie bestuur nie,” het hy gesê.
Wentzel het ook motoriste versoek om hul reise goed te beplan sodat hulle langs die pad genoeg tyd het om stil te hou en te rus.
Die Kaapstadse munisipaliteit het aangekondig hy gaan seker maak die publiek is veilig gedurende die Nuwejaarsvieringe.
Daar sal oral strenger wetstoepassing wees.
Richard Bosman, uitvoerende bestuurder van die munisipale veiligheids- en sekuriteitsdepartement, het in ’n verklaring gesê die beamptes sal motors by alle strande, openbare plekke en op deurpaaie voorkeer en deursoek om ’n veilige feestyd te verseker.
Daar is ook meer beamptes in die munisipale gebied ontplooi. Die beamptes sal onder meer die strande per voet, voertuig, fiets en te perd patrolleer om te keer dat mense onwettig optree soos om alkohol daar te gebruik.
- Die Burger