‘Ongedissiplineerde soldate hoort nie in weermag’
2010-12-17 07:26
Beeld
Pretoria - Enigiemand wat nie lojaal en betroubaar is of dissipline en toewyding het nie, moenie in die weermag wees nie.
Só het pres. Jacob Zuma gister in Thaba Tshwane in Pretoria gesê op die dag vir gewapende magte wat ter ondersteuning van militêre veterane gehou is.
’n Parade, nasionale saluut, ’n verbyvlug van vliegtuie en ’n kanonsaluut van 21 skote sou deel van die vieringe wees, maar dié is weens hewige reën afgestel.
Zuma het gesê vandag se soldate moet leer by die militêre veterane wat verskeie oorloë van weerstand en bevryding met “trots, dapperheid en toewyding” geveg het.
“Hulle het hul lewens op die spel geplaas sodat ons, die toekomstige geslagte, vryheid in ’n land kan geniet wat ons ons eie kan noem.
“Ons is trots op ons soldate wat deur toewyding, lojaliteit, dissipline en professionaliteit die land se beeld bevorder het wanneer hulle ontplooi word.
“Lojaliteit, dissipline, toewyding en betroubaarheid is ononderhandelbaar,” het Zuma gesê.
“Enigiemand wat dit te moeilik vind, moenie in die weermag wees nie.
“Ons soldate is nie gewone staatsamptenare nie. Hulle het spesiale aandag nodig, waaraan die regering tans werk.”
Volgens Zuma is van die veterane “wat met alles wat hulle gehad het, geveg het om die kettings van apartheid te breek”, vandag behoeftig.
Deur die stigting van die departement van militêre veterane kan die regering na hul belange omsien.
Zuma het gesê die voormalige stryders moet toegang tot sosio-ekonomiese ondersteuning hê om beter by die burgerlike lewe aan te pas.
Dit word gedoen met die hulp van die departemente van behuising, maatskaplike ontwikkeling, kuns en kultuur, verdediging en die nasionale tesourie.
“Die feit dat ons aan teenoorgestelde kante van die bevrydingsoorlog geveg het, is geskiedenis wat ons nie kan verander nie,” het Zuma gesê.
“Ons kan die hede en die toekoms verander. Ons kan en moet saamwerk om die land te herbou met dieselfde energie wat ons gebruik het om vir vryheid te veg of om die destydse apartheid- status quo te beskerm.”
Zuma het vandeesweek die Wysigingswet op Verdediging onderteken wat ’n bedeling daarstel wat die belange van die weermag sal bestuur.
- Die Burger