Onderwysstelsel 'erger as in apartheidsjare'

2012-03-23 10:00

Johannesburg – Suid-Afrika se onderwysstelsel is vandag veel swakker as tydens die apartheidsjare, het die akademikus en struggle-held Mamphela Ramphele volgens The Star gesê.

"Wiskundegeletterdheid... wat is dit? Dis erger as die rekenkunde wat ek onder Bantoe-onderwys gedoen het," het Ramphele gesê.

Ramphele het die sesde jaarlikse Solomon Mahlangu-lesing by die Universiteit van Johannesburg gelewer.

Ramphele het die veelgeprese matriekslaagsyfer gekritiseer, en gesê dis bedrieglik en plaas duisende op 'n lewenspad waar hulle nie verdere onderrig of werksgeleenthede kan najaag nie.

Sy het ook uitgevaar oor die slaagsyfer van 30%, en gesê dis 'n politieke foefie wat onderwysstandaarde verlaag.

"Kader Asmal [voormalige minister van onderwys] het vir mikropolitiek geval toe die slaagsyfer van 40 persent terwyl hy in beheer was, skielik 70 persent geword het."

Ramphele het verder uitgevaar oor die slaagsyfer van 70.2% wat verlede jaar se matrikulante behaal het.

"Daar was 'n groot bohaai oor die 'historiese' 70.2 persent, maar dié prestasie was bedrieglik – minder as 500 000 mense het opgedaag om hulle matriekeksamen te skryf; 539 102 studente [wat 12 jaar gelede in graad een was] het uit die stelsel verdwyn. Die onderwysdepartement moet vir ons sê wat het van daardie kinders geword."

– Volg Nuus24 op Twitter.

- SAPA