Onderwysers 'moet eis' ná aanvalle
2012-06-01 14:31
Kaapstad – Die SA Democratic Teachers' Union (Sadtu) het onderwysers wat deur leerlinge aangeval en beseer word aangemoedig om onderwysowerhede te dagvaar, het ‘n berig Vrydag gesê.
“Ons wil nie hê die sluise moet oopgedraai word nie, maar ons wil ons lede aanraai om regstappe te neem as die werkgewer nalatig was,” het die vakbond se sekretaris in die Wes-Kaap, Jonavin Rustin, aan die Cape Times gesê.
Die beroep op regstappe volg ná ‘n aanval Dinsdag op ‘n graad ses onderwyser by die St Anthony’s Laerskool in Heathfield, Kaapstad.
‘n Elfjarige leerder het die onderwyser met ‘n pen gesteek, waarna sy steke moes kry.
Volgens die koerant het die onderwyser berading ontvang en die saak is na die skool se beheerliggaam verwys vir ‘n formele dissiplinêre verhoor.
Die aanval kom twee maande nadat die provinsiale onderwysdepartement sy appèl verloor het teen die betaling van R1,1 miljoen in skadevergoeding aan ‘n onderwyser wat hom vir nalatigheid gedagvaar het.
‘n Leerling het Tania Jacobs in 2001 met ‘n hamer geslaan by die Rhodes Hoërskool in Kaapstad.
Die departement het sowat R6 miljoen spandeer op prokureurs en kenners tydens die saak.
– Volg Nuus24 op Twitter
- SAPA
