Onderwysers kry BSB voor Kersfees
2009-11-25 20:26
Johannesburg - Onderwysers sal voor Kersfees hul beroepspesifieke vergoeding (BSB) ten volle ontvang, het die onderwysersvakbond Sadtu Woensdag gesê.
"Die geduld, volhoubaarheid en gesamentlike leierskap van Sadtu het eindelik begin vrugte pluk. Ná maande se gewag sal onderwysers hul BSB ontvang, nie gedeeltelik nie, maar ten volle” het Sadtu in ‘n verklaring gesê.
Die oorspronklike voorgestelde datum vir betaling was April 2010.
In Oktober vanjaar het die onderwysdepartement aangebied om ‘n R2.3 miljard betaling van die BSB vir die erkenning van ondervinding in die vorm van ‘n eenmalige kontant bonus vir senior onderwysers te maak.
Dié betaling was nie gemaak nie vanweë druk op die Persal-salarisstelsel om die jaarlikse salarisverhogings in werking te bring.
Die departement het gesê dit sal die betaling aan die einde van November maak maar kon nie ‘n spesifieke datum vasstel nie. Sadtu het briewe aan die departement gestuur wat aandring op ‘n datum vir die betaling.
“Die departement het aangekondig dat dit die volle bedrag, soos ooreengestem, in die huidige finansiële jaar sal maak,” het Sadtu gesê.
Die betalings moet op 18 Desember vanjaar gemaak word.
- Sapa