Onderwyser slaan glo dat die bloed spat
2009-11-27 07:05
Bloemfontein - Die Klagte dat ’n Vrystaatse onderwyser glo geruime tyd sy leerlinge met die vuis slaan en skop totdat die bloed loop, gaan deur die departement van onderwys in die provinsie ondersoek word.
Ses van dié leerlinge tussen die ouderdomme van 13 en 18 jaar van die Hoërskool A.J.C. Jooste op Petrusburg het dié week in briewe hul griewe teenoor ’n kollega van die onderwyser gelug.
’n Klagte is ook by die kantoor van die Onafhanklike Klagtedirektoraat in Bloemfontein ingedien omdat die polisie op dié dorp glo weier dat die kinders klagte teen die onderwyser indien.
Isaac Ntshauba, woordvoerder van die onderwysdepartement, het Donderdag aan Volksblad gesê die onderwysdepartement ondersoek nou dié bewerings teen die onderwyser.
Dawid Badenhorst, wat al 15 jaar ’n onderwyser en koshuishoof hier is, sê: “Ek het nou besluit genoeg is genoeg. Die jongste aanrandings was Vrydag en Dinsdag toe dié onderwyser ’n leerling met die vuis geslaan het. Die kinders is bang vir hom. Ek het eers die naweek hiervan gehoor. Ek het al met die hoof gaan praat, maar niks word gedoen nie.
“Ek het Dinsdag in my klas gestaan en gesien hoe dié onderwyser sy vuis deur die deur druk en ’n kind in die gesig slaan. Die kinders het dié deur probeer toedruk, maar hy het die naaste kind met die vuis bygedam.
“Ek het dadelik na die klaskamer gegaan en toe ek daar kom, het dié seun vol bloed op ’n bank gelê. Dié onderwyser was reeds weg. Toe ek die leerling vra wat gebeur het, kon hy nie praat nie.
“Sy klasmaats het vir my gesê dié onderwyser het hom geslaan. Ek het met die hoof gaan praat. Maar daar is nooit iets gedoen nie, want ek glo almal is bang vir hom,” het Badenhorst gesê.
Jan Prinsloo, skoolhoof, het Donderdag by navraag gesê hy dra kennis van dié situasie. Hy sê daar is aanrandingsklagte by die skool, asook by die polisie ingedien, wat ondersoek word.
Hy sê dit is nie die skoolhoof se plig om ’n aanranding op sy skoolterrein by die polisie aan te meld nie. Hy wou nie verder kommentaar lewer nie.
Badenhorst sê hy het die leerlinge na die polisie geneem om verklarings af te lê, maar hy sê die polisieman het geweier om die kinders te help “omdat hulle nie tyd het nie”.
Badenhorst sê later dié week het dieselfde polisieman hom só gevloek dat hy en die leerlinge daar weg is sonder om ’n klag in te dien.
Hy het hierna dié polisieman by die Onafhanklike Klagtedirektoraat aangekla.
Hy sê op die ou einde is net een leerling se aanrandingsklag by die polisie teen die onderwyser geopen.
Insp. Harry Nagel, polisiewoordvoerder, het dié voorval bevestig.
Hy sê die stasiekommissaris sal ’n interne ondersoek na dié polisiebeampte se swak gedrag doen.
“Die polisie moet ten alle tye die publiek help as ’n saak geopen moet word.
“Onprofessionele gedrag soos dít word nie geduld nie. As mense soortgelyke probleme met die polisie het, moet hulle die voorval by die stasiekommissaris aanmeld. Badenhorst moet asseblief weer die saak aanmeld.”
- Volksblad
