Ondervinding seëvier bo ras, geslag voor RDK
2010-04-20 08:51
Anesca Smith, Beeld
Ondervinding het gister harder as ras of geslag gepraat toe ’n 67-jarige wit man die Regterlike Dienskommissie (RDK) feitlik oorrompel het.
Regter Willem van der Merwe het lede van die RDK só beïndruk dat Jeff Radebe, minister van justisie, naby die einde van die onderhoud verklaar het Van der Merwe kan op sý stem staatmaak.
Van der Merwe ding met twee swart kandidate mee om die pos van adjunk-regter-president in Noord- en Suid-Gauteng. Hy neem tans waar in die pos.
Ook Ngoako Ramatlhodi, voorsitter van die parlement se portefeuljekomitee oor justisie, het verklaar hy gaan vir Van der Merwe stem.
“Ons land benodig regters soos jy. Jy verteenwoordig ’n getransformeerde gesindheid. Ek is baie trots om jou my landgenoot te noem,” het Ramatlhodi gesê.
Tot dusver moes wit mans bontstaan om aan die RDK te regverdig waarom hulle eerder as swart kandidate of vroue aangestel moet word.
Van der Merwe, wat 25 jaar ondervinding het, meen die grootste bydrae wat hy in die minder as drie jaar voor aftrede het, is om vaardighede aan jong regslui oor te dra.
Hy het voorbeelde voorgelê oor hoe om vroue en swart regslui op te lei as waarnemende regters en hulle geleidelik aan ingewikkelde sake bloot te stel.
“Die regter wat die sake aan jonger kollegas toeken, moet hierdie mense se swak en sterk punte ken en hom hierdeur laat lei,” het hy gesê.
- Beeld