Twee advokate in wapenondersoek verwyder

2012-05-31 13:46

Johannesburg – Twee van die drie advokate wat verantwoordelik is vir die ondersoek na die wapentransaksie, is uit hul poste verwyder.

Financial Mail berig Vas Soni en Sthembiso Mdladla – twee van die drie advokate wat die bewyse moet assesseer – verrig nie meer die werk waarvoor regter Willie Seriti hulle aangestel het nie.

William Baloyi, woordvoerder van die geregtelike kommissie van ondersoek na die wapentransaksie, het aan Financial Mail bevestig dat beide regsverteenwoordigers “nie meer beskikbaar is om te dien nie.”

Die redes mag nie bekendgemaak word nie.

Die aankondiging kom byna agt maande nadat die kommissie se werk begin het.

Pres. Jacob Zuma het in Oktober verlede jaar gesê die kommissie sal al die bewerings van onreëlmatighede met die wapentransaksie ondersoek.

Zuma het reeds op 15 September aangekondig dat hy besluit het om dié ondersoek na die wapentransaksie te heropen om die saak “finaal tot ’n einde te bring”.

Volg Nuus24 op Twitter