Ondersoek na wapens baar dalk weer muis
2010-08-06 09:42
Volksblad
Kaapstad - Daar is opnuut aanduidings dat die parlement se ondersoek na die omstrede wapentransaksie ’n muis kan baar.
Die staande komitee oor openbare rekeninge (Skoor) sou eerskomende Dinsdag vergader het om met die sakeman dr. Richard Young oor sy verslag na aanleiding van die wapentransaksie te beraadslaag.
Young is die eienaar van die maatskappy CCII Systems, wat die tender vir die lewering van nuwe korvette aan die Suid-Afrikaanse Vloot verloor het.
Piet Pretorius, DA-LP en ’n lid van Skoor, het Donderdag aan Die Burger, susterkoerant van Volksblad, gesê die voorgenome vergadering met Young gaan “na alle waarskynlikheid” uitgestel word.
“Ons voel nie gemaklik daaroor nie.”
Pretorius en sy partygenoot Mark Steele is ook ontevrede omdat Themba Godi, Skoor se voorsitter, glo nie wil toelaat dat Young weer getuienis voor Skoor lewer nie.
Die Burger het vroeër berig dat Young verlede jaar ’n verslag van 600 bladsye aan Skoor oorhandig het waarin beweer word dat die bevindings van ’n gesamentlike ondersoekspan na die multimiljard- rand-wapentransaksie gedokter is.
Godi het Donderdag by navraag gesê Dinsdag se beplande Skoor-vergadering is nog nie finaal uitgestel nie. Daar sal vandag uitsluitsel daaroor wees. Hy het verder gesê Skoor het nooit onderneem om Young se getuienis aan te hoor nie. “Dié bewerings is verkeerd.”
- Volksblad