Ondersoek na Ferreira-voorval duur voort
2012-01-09 17:59
Johannesburg – Die polisie in Gauteng het Maandag gesê die LUR vir behuising Humphrey Mmemezi se bestuurder, wat verlede jaar die 18-jarige Thomas Ferreira getref het, word steeds onderdsoek.
“Die saak duur voort en die ondersoek is nog aan die gang. Ons sal ‘n hofdatum hê sodra ‘n datum deur die hof aangewys word,” het lt. kol. Katlego Mogale gesê.
“Ons het die dossier aan hulle gestuur en sodra ‘n datum aangewys word, kan ons met die saak voortgaan.”
Ferreira is beseer terwyl hy met ‘n motorfiets gery het in Krugersdorp in die eerste naweek van November.
Hy is deur ‘n motor waarin Mmemezi vervoer is, getref toe die voertuig se blou lig aan was om ‘n rooi verkeerslig te oorsteek.
Die polisie het op 9 November bevestig dat ‘n saak van roekelose of nalatige bestuur teen die bestuurder, Semitsi Modomai, oopgemaak is.
In dié stadium het die premier van Gauteng, Nomvula Mokonyane, in die openbaar beloof om die tiener se mediese koste te dra.
Die premier se woordvoerder, Xoli Mngambi, het alle navrae rakende die voorval na die woordvoerder van behuising, Mongezi Mnyani, verwys. Mnyani kon nie Maandag bereik word nie.
Hy het op 23 Desember gesê die departement het nog geen mediese koste van Ferreira gedra nie, maar sal vroeg vanjaar met die familie vergader om oor die pad vorentoe ooreen te kom.
Die koste van die rehabilitasiesentrum waar Ferreira behandel word, beloop luidens berigte sowat R120 000 per maand.
- Volg Nuus24 op Twitter
- SAPA