Ondersoek kom oor plakker op polisiebakkie
2013-02-04 08:32
Johannesburg – 'n Ondersoek na 'n plakker op 'n polisiebakkie met die woorde "You can run but you will die tired" ("Jy kan hardloop, maar jy sal moeg sterf"), is van stapel gestuur, het The Star Maandag berig.
Brig. Thulani Ngubane, woordvoerder vir die polisie in die Noordwes, het sy skok uitgespreek oor die plakker, wat glo ook 'n prent van 'n vuurwapen op het, wat agter op 'n polisievoertuig gepryk het.
"Ons sal ondersoek instel, vasstel wie die voertuig bestuur en stappe sal gedoen moet word."
Die voertuig was volgens die berig naby die toneel geparkeer waar 34 stakende mynwerkers op 16 Augustus verlede jaar gedurende 'n botsing met die polisie in Marikana gesterf het.
Ngubane het gesê dié soort praktyk word verbied, behalwe as spesiale toestemming in 'n spesifieke geval verleen is, omdat dit die polisie se naam en reputasie skaad.
Johan Burger van die Instituut vir Sekerheidstudies het gesê die plakker is onprofessioneel, veral wanneer dit gesien word in die lig van wat by Marikana gebeur het.
"Die boodskap sê iets van die bestuurder van daardie voertuig."
– Volg Nuus24 op Twitter.
- SAPA
