Onderhandelinge oor e-tol feitlik klaar

2012-10-02 10:35

Johannesburg – Padgebruikers kan hul e-skyfies gaan koop, aangesien die departement van vervoer besig is om hul praatjies oor die saak af te handel, het Ben Martins, minister van die departement, gesê.

Beeld berig Martins en ander staatsamptenare het Nasionale Vervoermaand in Soweto bekend gestel.

Hy sê die presiese pad vorentoe sal Vrydag op ’n mediakonferensie bekend gemaak word.

Die dagblad berig Martins wou nie nog vrae oor die e-tolstelsel en wanneer die regering beoog om daarmee te begin, beantwoord nie, maar het gesê: “Mense kan maar skyfies koop. Die departement is feitlik klaar met konsultasies met betrokke partye oor ’n oplossing wat moontlik almal se goedkeuring sal wegdra.”

Die konstitusionele hof het op 20 September die tussentydse interdik teen die instelling van die e-tolstelsel tersyde gestel wat die Suid-Afrikaanse Nasionale Padagentskap (Sanral) nou wettiglik die reg gee om tolgeld op Gautengse snelweë te hef.

Die Bondgenootskap Teen Stedelike Tol (Outa), wat in April die tydelike interdik teen die stelsel bekom het, het vroeër aangedui dat die regering nie gereed is om oornag met die e-tolstelsel te begin nie.

Volg Nuus24 op Twitter   

- SAPA