Onafhanklike mediatribunaal met tande nodig
2010-08-05 08:42
Die Burger
KAAPSTAD. – Die “karnaval van regstellings” in vandeesweek se koerante demonstreer opnuut dat selfregulering in die mediabedryf nie werk nie.
Só het Jeremy Cronin, SAKP-hoofsekretaris en adjunk-minister van vervoer, Woensdag in die SAKP se nuusbrief, Umsebenzi Online, tot steun van die instelling van ’n mediatribunaal geskryf.
Volgens Cronin is ’n onafhanklike mediatribunaal met tande nodig waar die publiek, met inbegrip van hoëprofiel-persoonlikhede, oor onetiese verslaggewing kan gaan kla.
’n Onafhanklike tribunaal wat aan die parlement verslag doen, sal nie die risiko loop om deur die meerderheidsparty gekompromitteer te word nie.
“Dit is moontlik dat dit kan gebeur, maar ek glo die voorbeeld van ons Menseregtekommissie en die huidige Openbare Beskermer toon dat dit (’n mediatribunaal) kan werk.”
Hy het egter gewaarsku so ’n tribunaal moet nie gebruik word om die regerende alliansie se “irritasies en frustrasies” met die gedrukte media te hanteer nie.
Die tribunaal behoort ook teen publikasies, en nie individuele verslaggewers nie, op te tree wanneer oortredings begaan word, omdat nuusinsameling selde net die betrokke joernalis se werk is. Dit is meestal ’n spanpoging.
Boetes vir oortredings, eerder as tronkstraf, sal gewens wees, het hy gesê.
Die ANC-jeugliga het hom in ’n verklaring by Cronin geskaar, maar gesê die tribunaal moet nou al ingestel word omdat die ANC aangeval word.
Die jeugliga meen die mediatribunaal moet koerante soos City Press, Die Burger, Rapport en Beeld uit die Media24-stal, asook die Mail & Guardian, Sunday Times en “al” die Independent-groep se koerante ondersoek vir karaktermoord, verdeeldheid wat hulle in die regerende alliansie saai, vals berigte en omdat hulle die regering ondermyn.
Helen Zille, DA-leier, en Lindiwe Mazibuko, DA-woordvoerder, hou later Donderdag ’n nuuskonferensie om hul ontevredenheid oor die Wetsontwerp op die Beskerming van Inligting en die mediatribunaal bekend te maak.
Zille het gesê Mzilikazi wa Afrika, ’n Sunday Times-joernalis, se inhegtenisneming Woensdag kan nie in isolasie gesien word nie en is ’n sinistere voorbode van hoe mediavryheid deur die beoogde mediatribunaal geskend sal word.
- Die Burger