Omstrede rubriekskrywer ondersteun Malema
2011-08-02 14:28
Johannesburg – Die omstrede rubriekskrywer Eric Miyeni sê Julius Malema, leier van die ANC-jeugliga (ANCYL), se soeke na ekonomiese vryheid is belangrik.
Miyeni, wat die land in rep en roer het ná sy rubriek oor die City Press-redakteur, het Dinsdag sy ondersteuning vir Malema op die radiostasie Talk Radio 702 uitgespreek.
Die skrywer het die radiostasie gebel om met Malema te praat gedurende ‘n uurlange uitsending waartydens luisteraars hul vrae aan die jeugliga-leier kon rig.
“Hou asseblief aan daarmee, ons kan nie hierdie armoede hê nie,” het Miyeni aan Malema gesê.
Die ANCYL het sy steun vir Miyeni gewys nadat die Sowetan die skrywer se rubriek beëindig het as gevolg van die kommentaar wat hy oor Ferial Haffajee – die “swart slang in die gras” – gemaak het.
“Mense soos Haffajee...word soggens wakker en sien hul swart gesigte in die spieël net om ’n golf van self-haat te ervaar wat hulle naar maak,” skryf Miyeni in sy rubriek, “Haffajee does it for white masters”.
Met verwysing na die halssnoermoorde in die townships tydens apartheid skryf hy: “In die 80’s sou sy waarskynlik ’n brandende buiteband om haar nek gehad het.”
Haffajee sê sy het sy kommentaar taamlik ernstig opgeneem en beplan om Miyeni te dagvaar.
Malema het aan die luisteraars gesê hy hou van Miyeni se moed.
“Ons benodig meer Erics in hierdie land,” het hy gesê.
Malema sê Miyeni het die ANCYL al talle kere in sy rubrieke gekritiseer. Hy voer aan dat dié kritiek nooit tot Miyeni se afdanking gelei het nie.
Die ANCYL het Dinsdag gesê hulle wil ‘n vergadering met die Sowetan en die uitgewer Avusa hou sodat daar aan hulle verduidelik kan word hoekom Miyeni afgedank is.
Volg Nuus24 op Twitter.
- SAPA