Omstrede Manyi word dalk gou DG
2011-07-25 07:05
Pieter du Toit en Jan de Lange
Kaapstad - Jimmy Manyi, omstrede hoofregeringswoordvoerder, kan moontlik eersdaags as direkteur-generaal (DG) van minerale hulpbronne aangewys word.
Hoewel dit nog nie bevestig is nie, is bespiegeling in regeringskringe volop dat Manyi ná ’n verwagte kabinetskommeling in dié kritieke pos ontplooi kan word.
Daar word ook gegis dat Susan Shabangu, minister van minerale hulpbronne, deur mGodfrey Oliphant, haar adjunkminister, vervang kan word. Oliphant is ’n Noord-Kaapse ANC-LP.
Sy is in 2009 as minister aangewys, maar het haar sedertdien die gramskap van die jeugliga op die hals gehaal deur te verklaar nasionalisering sal nie in haar leeftyd plaasvind nie.
Haar departement is ook vroeër in omstredenheid gedompel oor die toekenning van prospekteringsregte.
Volgens betroubare inligting is die kanse “beter as goed” dat Manyi, tans die kabinetswoordvoerder en hoof van die regeringskommunikasiediens (GCIS), adv. Sandile Nogxina, wat uitgetree het, kan opvolg.
“Hy is die jeugliga se keuse en boonop ’n gunsteling van die president. Sommige elemente in die regering druk al geruime tyd dat Jimmy die pos oorneem,” het ’n regeringsbron by navraag gesê.
So ’n aanstelling sal egter eers ná dié week se verwagte kabinetslekgotla gedoen word.
’n Ander senior regeringsamptenaar het gesê Manyi word beslis as kandidaat oorweeg. “Sommiges in die regering is egter huiwerig om hom in die pos te sien. Onthou egter die aanstelling van ’n DG bly uitsluitlik die president se prerogatief.”
Manyi, wat voor sy aanwysing as kabinetswoordvoerder as DG van die departement van arbeid geskors is, het ’n nasionale diploma in ekonomiese geologie aan die Universiteit van die Witwatersrand verwerf en het tien jaar by Anglo American se goudafdeling gewerk – vyf jaar as praktiserende geoloog by die destydse Pres. Brand-goudmyn in Welkom, en daarna in Anglo se hoofkantoor.
Manyi het gesê hy is goed gekwalifiseer vir die pos van DG, maar hy weet niks van die herontplooiing wat moontlik op hom wag nie. Hy was glad nie verbaas oor die moontlikheid nie.
“Ek kan dit nie ontken nie. Ek was in die buiteland tydens die vorige kabinetsvergadering en weet nie of dit bespreek is nie,” het hy gesê.
“Ek is ’n geskikte kandidaat vir só ’n pos. Geeneen van die direksies van mynmaatskappye sal draaie om my kan gooi nie.”
Volgens hom is hy nie amptelik oor sy moontlike verskuiwing na die departement van minerale hulpbronne ingelig nie, maar is hy verlede week ook uit ander oorde daaroor uitgevra.
Hy wou nie sê wie hom daarna gevra het nie.
Manyi is al geruime tyd onder politieke druk weens sy omstrede uitsprake as kabinetswoordvoerder. Daar was vroeër sprake dat hy dalk elders in die regering ontplooi kan word.
Sy moontlike verskuiwing na minerale hulpbronne is dalk ’n aanduiding dat die regering die angel uit die nasionaliseringsdebat wil probeer haal deur Manyi toe te laat om bemagtigingsteikens strenger na te jaag.
Volg Nuus24 op Twitter.
- Volksblad