Omstander sterf, 2 gewond ná wilde skietery
2011-09-01 15:55
Johannesburg – 'n Omstander is doodgeskiet en twee ander gewond tydens 'n skietgeveg in Kagiso aan die Wesrand, het die polisie gesê.
Vyf verdagtes het vermoedelik omstreeks 07:00 by 'n huis in Randfontein ingebreek en 'n TV-stel, rekenaar, R25 000 kontant en 'n Mercedes Benz gesteel.
Die mans het toe die huishulp en 'n seun in die huis vasgebind.
Die polisie het hulle tot in Kagiso gejaag, waarna 'n skietgeveg ontstaan het.
'n Polisievoertuig het toe omgeslaan en 'n polisiebeampte is beseer.
Lt.kol. Lungelo Dlamini, polisiewoordvoerder, het gesê drie lede van die publiek is tydens die skietery gewond.
"Een is op die toneel dood en die twee ander is hospitaal toe geneem vir verdere behandeling."
Twee verdagtes is in hegtenis geneem en word verbind met ander moorde en inbrake.
Die polisie is op soek na die ander twee verdagtes.
– Lees meer hier
– Volg Nuus24 op Twitter