Omgewingskrisis dreig by Grootvlei-myn
2010-09-12 07:57
Die Grootvlei-myn by Springs kan steeds ’n omgewingsramp veroorsaak wanneer die reënseisoen hier aanbreek.
Daar
is groot kommer dat Aurora, die swartbemagtigingsgroep wat Grootvlei
besit, steeds nie die suur mynwater vinnig genoeg uit die myn pomp nie,
sê Marius Keet, adjunkdirekteur van watergehaltebestuur by die
departement van waterwese.
Dit kan tot ’n omgewingsramp aan die
Oos-Rand lei wanneer die grondwatervlak in die reënseisoen begin styg en
die pompstasie by die myn oorstroom, sê Keet.
Die
Grootvlei-pompstasie moet daagliks 108 miljoen liter water uit die myn
pomp om te keer dat dit oorstroom, maar tans word heelwat minder water
per dag uitgepomp.
Rapport het twee weke gelede berig dat die
tempo van die watervlak in die myn so vinnig styg dat die pompe binne 30
dae onder water kan wees.
As dit gebeur, sal die myn oorstroom
en kan die vrot mynwater binne ’n paar maande in Nigel bo die
grondoppervlak begin uitvloei en binne ’n jaar oor die hele Oos-Rand
heen by fonteine uitborrel.
’n Spesiale taakspan wat deur die
parlement van waterwese aangestel is om die bedreiging van suur mynwater
onder Johannesburg se middestad te ondersoek sal ook môre vir die
eerste keer vergader.
Dit kom ná waarskuwings van
omgewingskundiges dat suur mynwater na verwagting oor 17 maande op
verskeie plekke soos Standard Bank se hoofkantoor en Golf Reef City kan
uitvloei en sinkgate aan die Oos- en Wes-Rand kan veroorsaak.
Die giftige mynwater is reeds 500 m onder die middestad se oppervlak.
Die taakspan moet vasstel wat die omvang van die probleem is en oplossings daarvoor probeer vind, sê Keet.
Een
van die oplossings is dat die regering die giftige water in Boksburg
uitpomp, waar dit behandel sal word voordat dit in die Kliprivier
gestort word, sê Keet.
Dit sal ’n jaar duur om die pomp ter waarde van R185 miljoen te bou.
- Rapport