Oliphant het oog op diamante
2010-11-14 06:16
Rapport
Suid-Afrika se nuwe adjunkminister van minerale besit aandele in mynmaatskappye en het prospekteerregte bekom om diamante in die Noord-Kaap te ontgin.
Godfrey Oliphant, oud-voorsitter van die parlementêre komitee oor openbare werke, is twee weke gelede ingesweer as adjunkminister van dié departement. Sy aanstelling was deel van pres. Jacob Zuma se onlangse kabinetskommeling.
“Ek het in dieselfde week wat ek ingesweer is my prokureur ingelig dat ek uit al die entiteite wil bedank,” het Oliphant gesê.
Maar selfs al bedank hy as direkteur van Letsema Mining, Letsema Diamonds en Slangheuwel Diamond Recovery, is daar ’n belangebotsing weens sy aandeelhouding in dié ondernemings.
Minstens een, Slangheuwel, het onlangs 62 prospekteerregte in die Noord-Kaap gekry van die departement waarvan hy nou adjunkminister is.
Ingevolge Oliphant se jongste belangeverklaring by die parlement besit hy 100% aandele in Slangheuwel.
Oliphant se woordvoerder, Musa Zondi, sê die prospekteerregte het in Maart verval.
Zondi word egter weerspreek deur die departement van minerale se eie register, wat op 19 Oktober bygewerk is, wat die status van Slangheuwel se aansoek om prospekteerregte as “aanvaar” aandui.
Oliphant besit ook 76% van Letsema Placement Team International, ’n Kaapse werwingsagentskap.
Verskeie van Zuma se nuwe kabinetslede besit ondernemings:
- Mildred Oliphant, minister van arbeid: aandele in ’n onderneming wat die bemagtigingsvennoot was van Afribooks, wat handboeke druk. Media24 het Afribooks in 2007 verkoop. Sy is ’n sakevennoot van Peggy Nkonyeni, speaker van die KwaZulu-Natalse wetgewer, en die Travelgate-politikus Bheki Ntuli. Oliphant het aan Rapport gesê al die maatskappye waarby sy saam met Nkonyeni en Ntuli betrokke is, is dormant. Sy het besluit om uit alle poste wat met haar sakebedrywighede verband hou, te bedank.
- Ngoako Ramatlhodi, nuwe adjunkminister van korrektiewe dienste en oudpremier van Limpopo: aandele in drie maatskappye en twee trusts. Dié maatskappye is Zebediela Bricks, Legakabile Mining en Lilhemba Investments, waarvan die ANC-LP Patekile Holomisa ook ’n direkteur is. Ramatlhodi het vyf direkteurskappe verklaar – ook sy betrokkenheid by Maruapula Capital, waarvan die oud-spioenbase Billy Masetlha en Thabo Kubu direkteurs is.
- Obed Bapela, nuwe adjunkminister van kommunikasie: aandele in ’n myn- en reismaatskappy. Daar is nie belangebotsing nie omdat “dié maatskappye nie in die kommunikasiesektor sake doen nie”.
- Dr. Joe Phaahla, adjunkminister van kuns en kultuur, sê die maatskappye waarin hy belange verklaar het, is óf dormant óf nie meer geregistreer nie. Hy het weens “ ’n vergissing” nagelaat om sy direkteurskap in Xclurox te verklaar.
- Marius Fransman, nuwe adjunkminister van internasionale betrekkinge, sê hy gaan nie meer private sakebelange hê nie. Fransman is ’n direkteur van MF Advisory Services, wat “spesialiseer in herstelstrategieë vir behuisingsmaatskappye”.
- Ben Martins, nuwe adjunkminister van openbare ondernemings, is ’n direkteur van Safire Insurance en Ndlovu-afslaers. Safire doen bosbou-versekering.
- Die rykste kabinetslid bly Tokyo Sexwale, minister van menslike nedersettings. Hy het aandele en aandeleopsies van R32 miljoen verklaar
- Rapport