'Olimpiese span moet SA na hoër hoogtes neem'

2012-07-12 22:37

Pretoria – Dit is die Suid-Afrikaanse Olimpiese en Paralimpiese spanne se kans om die land na hoër hoogtes te neem wanneer hulle Suid-Afrika gaan verteenwoordig, het pres. Jacob Zuma Donderdag gesê.

Zuma het die atlete Donderdagaand by die presidensiële gastehuis in Pretoria sterkte toegewens.

Die Olimpiese Spele vind plaas vanaf 27 Julie tot 12 Augustus en die Paralimpiese spele vanaf 29 Augustus tot 9 September.

"Dit is nou julle geleentheid om die land na nóg hoër hoogtes te neem," het Zuma aan hulle gesê.

"Ons was reeds in Beijing en nou gaan julle na Londen reis. Julle moet beter vaar as wat ons in Beijing gedoen het."

Zuma het dit duidelik gestel dat hy en die land hoë verwagtinge het.

Hy het gesê hulle moet die Spele aan oudpres. Nelson Mandela opdra.

"Wen vir Suid-Afrika en vir Afrika, en dalk netso belangrik as die ander, wen vir Nelson Mandela, wat op 18 Julie 94 jaar oud word.

"Hy het in 1994 die grondslag vir 'n wennasie gelê. Ons is 'n wennasie en ek kan aan julle sê dat ons gaan wen," het Zuma gesê.

– Volg Nuus24 op Twitter.

- SAPA