Okah-verhoor word uitgestel

2012-01-30 16:55

Johannesburg – Die Nigeriese terreurverdagte Henry Okah het Maandag in die Hooggeregshof in Johannesburg verskyn, waar sy verhoor uitgestel is.

Aanklaer Shaun Abrahams het versoek dat die saak tot 1 Oktober uitgestel word.

Regter Geraldine Borchers het bevestig dat die datum – wat presies twee jaar ná die misdaad gepleeg is sal wees – aanvaar word deur die hof.

Okah word daarvan beskuldig dat hy die meesterbrein was agter twee bomaanvalle op 1 Oktober 2010 in Abuja, Nigerië, tydens die land se Onafhanklikheidsdag.

Twaalf mense is dood en 36 is beseer. Hy is die volgende dag in Johannesburg in hegtenis geneem.

Okah was glo die leier van die Movement for the Emancipation of the Niger Delta, wat verantwoordelikheid vir die aanvalle aanvaar het.

– Volg Nuus24 op Twitter
 

- SAPA